Энэ сарын 27-ны билэгт сайн өдрөөр ЭСЯ-ндаа морин хуур залах ёслолыг зохион байгууллаа.

Хуурын хөгийг морин хуурч Ц.Мөнх-Эрдэнэ тэгшлэн, уламжлал ёсоор Жонон харын явдал аялгууг эгшиглүүлж, хурсан олны сонорыг мялаав.

Ёслолын арга хэмжээнд Прага хотноо болсон олон улсын монголч эрдэмтдийн хуралд оролцсон Монголын болон олон улсын нэртэй монголч эрдэмтэн, судлаачид, мөн Чехийн төр, засгийн байгууллагын төлөөлөгчид, Карлын Их сургуулийн Монгол судлалын тэнхимийн багш, оюутнууд, Чехэд үйл ажиллагаа явуулж буй Монголын ТББ-ын төлөөллүүд, бизнес эрхлэгчид, Чех дэх оюутан, залуучуудын төлөөллийг урьж оролцуулав.

Монгол Улсын Ерөнхийлөгчийн “Морин хуураа дээдлэн, дэлгэрүүлэх тухай” зарлиг 2002 онд гарсан байдаг бөгөөд 2003 онд ЮНЕСКО Монголын уламжлалт морин хуурын урлагийг “Хүн төрөлхтний аман болон утга соёлын шилдэг дээж”-ээр тунхаглаж, 2008 онд хүн төрөлхтний Соёлын биет бус өвийн төлөөллийн жагсаалтад бүртгэсэн билээ.

Прага дахь ЭСЯ

2022 оны 10 дугаар сарын 30